Samsung, ama faraceeda Brazil, ayaa hadda ka soo kabanaya dhac weyn oo shirkadda ku kacay ku dhawaad 36 milyan oo doolar oo alaab ah. Sida ay sheegeen dad goob joogayaal ah, waxa ay ahayd dhac sida wax laga soo gooyay filim Action ah, kaas oo ka dhacay warshad ku taal magaalada São Paulo, taas oo caan ku ah dambiyada sare. Wax yar ka dib saqdii dhexe, 20 nin oo hubaysan ayaa xoog ku galay warshadda, kuwaas oo qabsaday shaqaalaha, kana saaray baytariyada telefoonada si ay uga hortagaan in shaqaaluhu wacaan booliiska.
Intaa ka dib, 7 baabuur ayaa gudaha u galay dhismaha, kuwaas oo tuugadu ku rartay tiro telefoono ah, tablets iyo laptops, kuwaas oo qiimahoodu ahaa ku dhawaad 36 milyan oo dollar. Raggan oo ku hubeysnaa qoryaha darandooriga u dhaca ayaa si qarsoodi ah ugu diyaar garoobay dhaca, iyagoo adeegsanaya dareyska rasmiga ah ee shaqaalaha ka howlgala warshadda la siiyay. Marka la eego in tuugadu ay heli lahaayeen dareeska shaqada oo ay garanayaan halka ay alaabtu yaallo, booliisku waxay qiyaasayaan in qof ka tirsan shirkadda uu gacan ka geystay tuuga. Ma jirto cid wax ku noqotay weerarkaas, balse Samsung ayaa sheegtay in ay si xooggan ula shaqaynayso booliiska si ay u daba-galaan noocyada kala duwan ee la xaday, ayna qorsheynayaan in ay mustaqbalka xoojiyaan ammaanka dhismaha.
*Isha: ZDnet
